Cebu Sharks gisungag sa Mindoro Tamaraws
CEBU, Philippines – Namugnaw ang Cebu Sharks sa second half dayon na pagkahisukamod niini ngadto sa makapadismaya nga kapildihan sa mga kamot sa Mindoro Tamaraws, 73-94 sa 2019 Maharlika Pilipinas Basketball League (MPBL) Lakan Cup niadtong Lunes sa gabii didto sa Pasig City Sports Complex sa kaulohan.
Nabiyaan og siyete puntos sa halftime, 40-47, nakapakita pa og maayong labok ang Sharks human gitali ang nag-unang kuwatro puntos sa second half aron pagsikit niini ngadto na lang sa tres puntos, 44-47.
Apan mao na diay kadto ang katapusan nilang ikabuga gumikan kay ang Tamaraws mitagak og 26-10 nga bomba aron pagpaburot sa ilang labaw ngadto na sa 19 puntos, 73-54 sa nahibiling 10 minutos sa duwa.
Ang Tamaraws nga miwani sa Sharks sa rebounds, 49-36 padayon nga nanginit hinungdan nga giinat pa ang ilang bentaha ngadto na sa 24 puntos, 83-59 human sa nasud nga lay-up ni Rodel Vaygan sa katapusang 7:04 sa aksiyon.
Si Vaygan mipabuto og 30 puntos alang sa Tamaraws nga mibayo sa Sharks og 13 ka 3-pointers. Samtang uga kaayo ang tinirahan sa Sharks nga nakapasud lamang og tulo sa gibuhian nilang 24 ka tres.
Dako sab og natampo sila si Mac Baracael ug Sandy Cenal nga nagkumboya'g 24 puntos sa Mindoro.
Si Rhaffy Octobre mihipos og 18 puntos, samtang si Fil-Australian William McAloney mitimbre og 14 puntos, apan pareho silang nangaminghoy gumikan kay ang Sharks nakatilaw sa ikaupat nilang pilde sud sa pito ka duwa.
- Latest