Romeo kuyaw pamantangan og silot sa PBA

CEBU, Philippines — Posibleng mapahamtangan og silot sa PBA Commissioner's office si San Miguel Beermen star Terrence Romeo human malambigit  sa nahitabong kasikas  tali  sa mga players sa NorthPort Batang Pier niadtong Domingo.

Si Romeo nakita nga diriyot makigsumbagay sa iyang teammate kaniadto sa NorthPort nga si Nico Elorde atol sa usa ka play dihang nagkapisikalay ang duha. Nasundan kini dihang mihimo og 'dirty finger' si Romeo punting ngadto sa NorthPort bench nga mipakita usab sa ilang kasuko sa kanhi nila teammate.

Nasayran nga si Romeo misikat og una uban sa NorthPort nga mikuha kaniya atol sa 2013 Rookie Draft, apan nahimong bati ang panagbuwag niya sa koponan nga mi-trade kaniya niadtong tuig 2018 sa TNT KaTropa. Si Romeo aduna sa'y kasuko ngadto ni Batang Pier coach Pido Jarencio  nga diriyot sab niya gikasukmagay kaniadto sulod sa korte.

Wala pa'y opisyal nga pamahayag gikan sa Commissioner's office, apan nahitabo ang kagubot niadtong Domingo atubangan ni Commissioner Willie Marcial nga mitan-aw sa duwa.

Si Romeo nangayo hinuon og pagsabot ug  miingon nga likayan niya nga mausab na ang maong insidente ilabi na sa Game-2 sa ilang best-of-three quarterfinals series ugma. (BANAT NEWS)