Binukbukay na!

CEBU, Philippines — Mibahad si Pinoy ring star Manny Pacquiao nga  susama sa buhaton sa usa ka maestro ngadto sa iyang estudyante, iyang tudloan og leksiyon si Keith Thurman sa 12 ka hugna nilang kumbati alang sa WBA unified welterweight title karong adlawa didto sa MGM Grand Garden Arena sa Las Vegas, Nevada.

"Tomorrow night, class is in session," matud pa ni Pacquiao pinaagi sa iyang tigpamaba didto sa Amerika.

Ang 40-anyos nga si Pacquiao tataw nga magsandig sa halapad niyang kasinatian batok sa mas batan-on nga si Thurman nga manghod niya og 10 ka tuig. 

Beterano sa 70 ka away, si Pacquiao nagbitbit og 61-7-2 record diin 39 ka daog pinaagi sa knockout, samtang si Thurman wala pa'y pilde sa 29 ka away diin 22 sa iyang mga biktima iyang gipakulaka.

Atol sa official weigh-in kagahapon, yanong gikuha nilang Pacquiao ug Thurman ang ensaktong timbang timaan sa ilang kaandam nga mabinukbukay sa ring karong hapon. Pareho silang mitimbang og 146.5  libras.

Nanghinaut si Pacquiao nga si Thurman nagtuon og maayo gumikan kay iyang sukdon taman sa ginhawa kon unsay mga nakat-onan niini sa boksing. "I hope Keith Thurman studied hard because Prof. Pacquiao gives very hard tests," sumala pa sa bugtong eight-division world champion sa kasaysayan. Sa nangaging mga adlaw, si Thurman wa'y puas ang  pagbugal-bugal ngadtong Pacquiao. Apil sa mga iyang gipasiatab mao nga iyang ilansang ug paretayron  si   Pacquiao ug iyang kining patikangkangon sud lamang sa duha ka hugna.

Mibokal man tuod ang iyang dugo tungod sa kahambog ni Thurman, apan si Pacquiao nagkanayon nga dili niya personal ang wa'y pildeng Amerikano niyang karibal.

"For me nothing is personal," nagkanayon   si Pacquiao. "Our job is to fight. He has to prove something, and I have to prove something. It's easy to say things. But it's not so easy to do it in the ring."

Sa iyang bahin, si Thurman miinsister nga talisaop na ang karera ni Pacquiao ug iya na sab panahon karon nga  mosidlak.