Archangels, RnT pabilin nga walay pilde sa MGBL
CEBU, Philippines — Ang mga teams nga nagsul-ot sa uniporme sa Minglanilla Archangels nagpabiling wa'y pilde ingon man ang RnT sa 1st Minglanilla GSports Basketball League (MGBL) Developmental Age-Group Tournament niadtong weekend didto sa Minglanilla Sports Complex.
Si Jhon Niño Caballero mikolekta og 21 puntos sa dihang gibuntog sa Archangels ang Modena, 83-68 alang sa ilang 2-0 nga baraha sa Under 17 division.
Wala sab magpaalkansi si Jhon Charles Tarossa nga mipupo og 16 puntos sa RnT nga mibulhot ngadto sa ikatulo nilang sagunson nga daog human gilabhan ang Minglanilla Ballers, 66-51.
Sa uban pang mga duwa sa U17, si William Archimedes Allosada mikadlit og 19 puntos sa dihang gibuntog sa University of San Carlos (USC) ang Spire, 70-60 alang sa ikaduha nilang sunod-sunod nga daog, samtang si TC Machete mitagak og 23 puntos sa Salazar Colleges of Science and Institute of Technology (SCSIT) Skyblazers nga midemolis sa JP Sports, 89-49 aron inaton ang ilang record ngadto sa 2-1.
Sa Under 13 category, si Kent Altoveros mitali og 12 puntos aron pangulohan ang Archangels ngadto sa 48-22 nga demolisyon sa Mighty Technologians, samtang si Chedreyc John Benitez mikamada og 18 puntos sa dihang gilampurnas sa (USJ-R) ang Minglanilla Ballers, 59-28.
Ang Archangels padayon karong naghari sa liderato sa U13 Bracket A uban ang 3-0 nga baraha, samtang ang USJ-R nagtangag na karon og 2-1 nga marka.
Sa lain pang mga aksiyon sa U13, ang Quatros nimasaker sa Tubod Elementary School, 79-19, samtang ang Vanguards mikastigo sa Lipata, 63-27.
Mao kadto ang labing unang daog sa Quatros ug Vanguards kay pareho man silang napilde sa nag-una duha nilang duwa.
- Latest
