Celtics aduna na'y ikapuli ni Irving

CEBU, Philippines — Gidungog pa lang gani  nga mobiya si Kyrie Irving, apan ang Boston Celtics daw aduna na'y nakit-an nga mohulip unya sa posisyon nga biyaan sa All-Star.

Kini human ang Celtics gikataho nga nakig-negosasyon na karon ni Charlotte Hornets point guard Kemba Walker aron agnihon kini nga moduwa kanila kon opisyal na kini nga mamahimong free-agent karong Lunes.

Ang three-time All-Star nga si Walker maoy sinaligan sa Hornets sud sa walo ka season diin nakita ang katakus niini sa scoring ug playmaking. Si Walker mi-average og 25.8 points sa miaging season ug nakita sa Celtics nga haom kini nga ilis ni Irving.

Si Irving gidungog na nga walay plano moduwa pa sa Celtics sa sunod season diin gitan-aw niini ang Brooklyn Nets o Los Angeles Lakers isip koponan nga iyang balhinan.

Timaan nga seryoso ang Celtics nga makuha si Walker, ang koponan mibuhi usab sa ilang backup pointguard nga si Terry Rozier aron mahawanan ilang salary cap.

Nakita sa kadagkoan sa Boston nga haom si Walker nga moduwa uban sa ilang batan-ong line-up nga naglangkob nila ni Jayson Tatum, Gordon Hayward ug Jaylen Brown.