Avengers nakigsawo na sa liderato sa LBA Friendship Cup 2019
CEBU, Philippines — Mikatkat na sa unang dapit sa standing ang Mobile Legends human midaog batok sa Dota-2 sa iskor nga 72-66 sa LBA Friendship Cup 2019 niadtong Miyerkules didto sa Lamac gym sa Consolacion.
Ang Mobile Legends kasamtangan nga nakigsawo sa CCT Builders sa managsama nilang baraha nga 3-2.
Ang team manager nga si Tata Pellejera maoy nangunay sa pagpangulo sa iyang koponan nga Mobile Legends pinaagi sa iyang 15 puntos.
Si Atan Lausa miamot og 14 puntos sa Mobile Legends nga maoy midiktar sa tibuok duwa aron pagtiklo sa Dota-2 nga adunay 3-3 record.
Sila si Vanz Abatayo ug Rico Sungahid mao sab ang nangu sa Dota-2 ni Junax Ermac nga nagkumbinar og 30 puntos.
Sa laing bahin, ang Avengers mikulit sa ikaduha nilang daog human gilubong ang CCT Builders, 82-61.
Mismo ang team manager nga si Dr. Jun Borces mao gyud ang migiya sa iyang koponan nga mipahaguros og 17 puntos.
Labaw og 11 puntos ang Avengers sa halftime, 43-32, ug miburot pa kini ngadto sa 61-43 human sa tulo ka kuwarter.
Didto nakapanemaho na sa ilang sayong kadaogan ang Avengers.
Midaog man tuod, apan ang Avengers pabiling nagbitay sa standing sa ilang 2-4 record.
Ang CCT Builders ni Engr. Chucho Tan gipangulohan ni Francis Palero nga miugbok og 12 puntos, gisundan nilang Roy Ermac ug Jay Abella nga miugkat og 11 puntos matag usa.
Ang liga nga nahimo pinaagi sa paningkamot sa presidente niining si Roy Ermac, ubos sa superbisyon ni commissioner Gene Pellejera.
PUNTOS MATAG USA
Unang duwa:
AVENGERS (82) – Borces 17, Monreal 9, Casiao 8, Dence 8, Abillon 6, Joefil 6, Valle 6, Malicay 4, Janginon 4.
CCT Builders (61) – Palero 12, E. Ermac 11, Abella 11, Madrid 9, Rosales 6, Goc-ong 4, Cabahug 4, G. Ermac 2, Quiao 2.
Ikaduhang duwa:
MOBILE Legends (72) – Pellejera 16, Lausa 14, Dayday 10, Lacio 8, Quijano 7, Bihag 6, Reuyan 5, Monares 4, Boyet 2.
DOTA-2 (66) – Abatayo 16, Sungahid 14, Felix 10, Geverola 8, Junax 6, Montermoso 4, Norwin 4, Aya 2, Auguis 2, Gonzales 2.
- Latest
