Ravena bag-ong sinaligan sa Gilas pilipinas
CEBU, Philippines — Gipahibalo ni coach Yeng Guiao nga si Kiefer Ravena mao na ang bag-ong sinaligang starting point guard sa Gilas Pilipinas nga moduwa sa World Cup sa Agosto didto sa China.
Bisan wala pa makapagawas og official line-up ang Gilas sa World Cup, si Guiao miingon nga si Ravena ang segurado na makakuha og luna sa koponan uban nila ni Andray Blatche ug JuneMar Fajardo.
Si Ravena maoy magpas-an sa responsibilidad nga gibiyaan ni kanhi "Best point guard in Asia" nga si Jayson Castro nga miretiro na sa pagduwa sa Gilas. Pilipinas.
Si Ravena wala pa tugti nga makabalik og duwa sa NLEX Road Warriors tungod kay sa sunod bulan pa mapupos ang iyang 18-month ban.
Hinuon, ang kanhi UAAP MVP hinay-hinay na nga mibalik sa ensayo ug mipakita kini nga wala maapektohi iyang duwa bisan pa sa taas nga pahuway. (BANAT NEWS)
- Latest