Russell posible mabalik sa Los Angeles Lakers

CEBU, Philippines — Posible nga mabalik sa Los Angeles Lakers ang All-Star point guard sa Brooklyn nga si D'Angelo Russell nga gusto nang mobiya sa  Nets.

Si Russell nakuha sa Lakers isip No .2 pick niadtong tuig 2015, apan gi-trade siya ngadto sa Nets niadtong 2017 tungod sa pagsulod ni Lonzo Ball.

Hinuon, karon nga wala na si Ball, kinsa gi-trade sa Lakers didto sa New Orleans Pelicans, si Russell giingon usa sa mga banggiitang point guard nga pangulitawhan sa Lakers.

Si Russell mihimo sa labing nindot nga performance sa iyang karera sa miaging season human siya mi-average og 21.5 points.  Usa sab siya sa nakatabang aron makabalik ang News sa playoffs.

Si Russell una na nga miingon nga maglisud siya pagduwa uban ang laing star point guard sa usa ka koponan tungod kay mag-ilog sila sa playing time.

Ang Lakers nangita og masaligang guwardiya aron makatabang sa tandem nila ni superstar LeBron James ug Anthony Davis. (BANAT NEWS)