Webmasters dunay misyon sa bayugan

CEBU, Philippines — Mosuway na sab og sakmit sa korona ang Mair Construction-University of Cebu (UC) Webmasters sa ilang pagbiyahe og balik sa Bayugan City, Agusan del Sur alang sa 2019 Mayor Kim Lope A. Asis Invitational Basketball Tournament nga sugdan ugma didto sa Lope Asis Memorial Gymnasium.

Sa miaging edisyon sa tinuig nga torneyo, ang Webmasters mipahiluna lamang sa ikaduhang dapit human gipilde sa University of  Sto. Tomas (UST) Growling Tigers sa kulbahinam nilang kampiyonato.

Tuyo sa Webmasters nga makataak og balik sa finals, apan si coach Raul 'Yayoy' D. Alcoseba miangkon nga  lisud nga tahas ang ilang sagubangon gumikan kay siyam sa iyang mga players pulos mga rookie.

Duha na lang ka buok ang nahibilin sa karaang line-up sa UC nga sila si   Darrell Shane Menina ug John Calvin Jabello.

Wala na sab uban kanila ang tang-an nilang import nga si Frederick Elombi.

Ning higayona hinuon, ang Webmasters moparada sa bag-o nilang langyaw nga student-athlete nga si Tosh Sesay gikan sa Sierra Leone.

Anaa sab sa ilang poder ang sharp-shooter nga si Tristan Albina nga kanhi niduwa uban sa University of the Visayas (UV) Green Lancers ug ang kanhi bitoon sa high school nga si Luigi Gabisan nga tataw makapalig-on sa ilang opensiba.

Ang Webmasters mosikad sa ilang kampanya karong Miyerkules batok sa ARQ Builders-Far Eastern University (FEU) Tamaraws.

Laing entrante gikan sa Cebu, ang Vincare Pharma/Southwestern University (SWU)-Phinma Cobras, makigtige batok sa HMMED Enterprise-Cagayan de Oro selection.

Ang Madyaw Construction/Valenzuela Classic maoy nagkumpleto sa lima ka partisipanteng koponan ning upat ka adlaw nga aksiyon nga gituyo aron pagdugang og lamas sa selebrasyon sa ika-12 nga Charter Day sa Baguyan ug Bayug Festival.

Ang mga entranteng koponan moduwa ubos sa single round robin format. Ang top 2 teams maoy mag-ilog sa titulo sa tinagakay nga duwa.

Ang makampiyon mobulsa og P200,000, samtang ang mopahiluna sa ikaduha ngadto sa ikaupat nga dapit makadawat og P150,000, P100,000, P75,000 ug P50,000. (BANAT NEWS)