Albindo napakyas sa iyang misyon

CEBU, Philippines — Pakyas sa iyang misyon ang Sugboanong mixed martial arts fighter nga si Allan Albindo  human mapilde pinaagi sa   split decision batok ni Manthan Rane sa India sa One Warrior Series sa miaging adlaw didto sa Singapore.

Mipakita og kaisog ang 22-anyos nga si  Albindo sa Yaw-Yan ArDigma, apan dili kini igo aron makuha niya ang daog.

Gibanatan ni Albindo og mga kinumo ug patid si Rane, apan ang naulahi migamit sa iyang abilidad sa ground aron mapugngan ang ataki sa Sugboanon fighter.

Gianugnan kaayo si Albindo sa maong away tungod kay ang kadoagan mohimo unta niya nga usa sa mga prospect sa maong 14-man tournament diin magpaabot kaniya ang usa ka One Championship contract ug $100,000 nga ganti.

"Dissapointed ko sa performance pero mas dasig ko run nga mo-train og maayo aron ma-improve akong abilidad," matud pa sa taga-Argao,Cebu.

Si Yaw-Yan ArDigma Cebu founder Master Beningo 'Ekin' Caniga Jr. masaligon nga makabawi iyang batos kon mahatagan man kini og laing kahigayonan sa maong MMA organization.