Jamal's Lechon, Joshua & James kampiyon sa sitio Telecom Caging

CEBU, Philippines — Kampiyon ang Jamal's Lechon ug Joshua & James sa ilang tagsa-tagsa ka dibisyon sa 1st Inter-block Sitio Telecom Basketball Tournament didto sa ilang basketball court sa Barangay Casuntingan, Dakbayan sa Mandaue.

Kini human giihaw sa Jamal's Lechon ang  Telecomton sa iskor nga 58-45 aron maghari sa Junior C division.

Nagkumboya'g 32 puntos silang Raymond Romarate ug Titing Cabo aron pangulohan ang Jamal's Lechon nga naglumpayat sa kalipay.

Si Romarate mibagnos og 17 puntos, samtang si Cabo mikandos og 15 puntos.

Ang Telecomton gipangulohan sab ni Muchard Pasaol nga mikamada og 12 puntos, gisundan ni Sajid Burasca nga miratsada og 11 puntos. Sila si Mike Ocier ug Junjun Valera nagtampohay og 10 sa napildeng Telecomton.

Sa laing bahin, ang Joshua & James nakalabang sa lawod sa kalisdahan pinaagi sa pagpukan sa Farmacia Zamora, 51-48 aron paglangkat sa korona sa 40-above division.

Sulagma kaayo nga ang mga team owners maoy nangu sa ilang tagsa-tagsa ka koponan.

Si Jessie Rosales mipupo og 11 puntos aron mangu sa scoring sa Joshua & James, samtang si Ben Basiga miani og nuybe puntos sa Farmacia Zamora.

Gawas ni Rosales, laing miiskor og double figures sa Joshua & James mao sila si Apet Cabahug, YK Arranchado, Tangkad Dinopol ug Vencio Arranchado nga mikadlit og 10 puntos matag usa.

Sila si Rodel Villagonzalo, Romy Aranzado ug Glen Baran parehong miantog og otso puntos alang sa Farmacia Zamora.

Ang liga nagmalampuson tungod sa pagtinabangay sa nagpakabanang mga indibidwal ilabi na nilang Rodel Villagonzalo ug Obeth Ramos nga maoy nag-organisar sa maong kalihukan ug sa mga sakop sa organizing committee nga sila si Danico & Marcio Cabatingan, Romy & Jason Arranchado, Zuzev Zanoria, Jean & Samsam Ramos, Aya Madel Tormis.

Sa officiating committee nga silang Irish Joy Villagonzalo, Jillian Ara Villagonzalo ug Kristine Ira Villagonzalo ug sa mga reperi nga silang Egi Ramos, Andof Tapere ug Roldan Pelayo.