Dota 2 mibuntog sa Black Panthers sa LBA Friendship Cup

CEBU, Philippines — Nasugamak na gyud ang haring gangis Black Panthers dihang gibuntog sila  sa  Dota 2  sa iskor nga  83-94  sa Lamac Basketball Association (LBA) Friendship Cup 2019 niadtong Miyerkules didto sa Lamac gym sa Consolacion.

Si Rico Sungahid responsabli sa maong kadaogan human siya miiskor og 21 puntos. Wala sab paalkansi si Vanz Abatayo nga miamot og 12 puntos sa Dota 2 nga nakigsawo sa ikaduhang dapit bitbit ang 2-2 nga baraha uban sa Mobile Legends nga napilde sab batok sa Avengers, 69-60.

Ang team manager nga si Junax Ermac  ug si Rio Quijano  parehong mitimbre'g 10 puntos sa Dota 2 nga wala na molingi human miposte og 43-42 sa halftime.

Nangulo sa Black Panthers mao si Jay Abella nga mikabkab og 18 puntos, gisundan ni Lloyd Chavez nga mitusik og 16 puntos, samtang  ang team manager nga si Roy Ermac mitimbre og 13 puntos ug si Philip Goc-ong miambit og 10 puntos sa Black Panthers.

Napilde man tuod, apan ang Black Panthers mao gihapon ang lider sa standing sa ilang 2-1 record.

Sa laing bahin, si Konsehal Odog Dayday miiskor og 17 puntos aron pangulohan ang kadaogan sa Avengers.

Naggukod ang Avengers sa nag-unang duwa ka kuwarter, apan nausab ang dagan sa duwa sa third period dihang mi-rally kini aron mailog ang dos puntos nga labaw, 47-45 human sa tulo ka kuwarter ug wala na sila molingi pa sukad niadto.

Ang team manager nga si Dr. Jun Borces ug si Roso Abillon nag-amotay og 10 puntos sa Avengers nga bisan pa sa ilang kadaogan, nangiwit lang gihapon sa standing uban ang 1-3 nga baraha.

Ang team manager nga si Tata Pellejera mao mismo ang nangu sa napilde niyang koponan Mobile Legends pinaagi sa iyang 13 puntos.

Ang liga giorganisar sa  presidente niining si Roy Ermac ug ang mga duwa gipadagan ni commissioner Gene Pellejera.

Puntos matag usa

Unang duwa:

DOTA 2 (94) – Sungahid 21, Abatayo 12, Quijano 10, Junax 10, Geverola 8, Goc-ong 8, Montermoso 8, Tyron 7, Norwin 6, Aya 4.

BLACK Panthers (83) – Abella 18, Chavez 16, R. Ermac 13, P. Goc-ong 10, Rosales 8, Tan 6, G. Ermac 6, Malunjao 4, Quiao 2.

Ikaduhang duwa:

AVENGERS (69) – Dayday 17, Casiao 14, Borces 10, Abillon 10, Wowie 6, Dence 4, Joefil 4, Ramse 2, Malicay 2.

MOBILE Legends (60) – Pellejera 13, Edward 10, Lausa 8, Lacio 8, Dayday 8, Quijano 5, Perjes 5, Reuyan 3.