Smiley dental clinic nakaibot na gyud og daog

CEBU, Philippines – Sa ikaupat nga pagsuway, ang Smiley Dental Clinic nakaibot na gyud og daog batok sa Sebandal, 69-59 sa LABA Summer League 2019 niadtong Lunes didto sa Co Tiao King gym sa Tabok, Mandaue City.

Nagkumboya og 33 puntos sila si Richard Madrid ug Francis Palero aron mangulo sa opensiba sa Smiley Dental Clinic nga milansang og 18-9 nga bentaha human sa unang 10 minutos sa duwa.

Wala pa matagbaw, ang Smiley Dental Clinic nilang co-managers Dr. Jun Borces ug William Oljol mibingat pa sa ilang labaw, 52-30 pagtak-op sa third period nga maoy instrumento paglangkat og daog.

Ang 1-4 nga Sebandal gipangulohan ni Adie Cinco nga mitikdol og 12 puntos, gisundan nilang    Edgar Bercero ug Asis nga mitimbre'g 10 puntos matag usa.

Sa laing aksiyon, ang Toncabs Auto Repair Shop mikulit sa ikatulo nilang daog pinaagi sa pagmasaker sa AC Troopers, 77-62.

Sila si Ramie Suson ug Beinsen Herbieto nagkumbinar og 31 puntos sa Toncabs Auto Repair Shops ni Tony Cabucos nga naglisud sa nag-unang duha ka kuwarter hinungdan nga nabiyaan sila sa halftime, 29-31. Human magkatabla  sa third period, 48-all, ang Toncabs Auto Repair Shop ni coach Tony Alcover  misugod na og arangkada ug ilang gibanatan ang AC Troopers  aron moposte og 3-1 nga baraha.

Ang AC Troopers ni playing   team manager P/Capt. Dondon Coloscos, gipangulohan ni   Templado nga mipabuto og 12 puntos. Ang AC Troopers nakatilaw sa ikatulong pilde batok sa usa ka daog.

Sa lain pang duwa, ang reigning champion Monterroyo-Jordan pabiling nag-una sa standing dihang ilang gilubong ang Hermag Boys, 67-53.

Gipangulohan ni   Tawing Grafe ang daog pinaagi sa iyang 14 puntos, gisundan ni Richard Jordan sa adunay 12 puntos ug Marlon Mendoza nga miambit og 10 puntos.

Tulo sab ka players sa Hermag Boys ang miiskor og double figures pinangulohan ni Brundenyl Manzo nga mikabkab og 16 puntos. Sila si Macmac Borga ug Patrick Dayanan miamot og 12 ug 10 puntos.

Ang Monterroyo-Jordan nilang co-managers Dr. Raul Monterroyo ug Richard Jordan aduna na'y 4-0 win-loss record, samtang ang Hermag Boys ni playing team manager Alan Buenavista nagbitbit og 2-1 nga baraha ning maong liga nga giorganisar ni LABA president P/Capt. Dondon Coloscos.

Ang mga duwa ubos sa superbisyon ni league commissioner Albert 'Obet' Ramos sa abag nilang Roy Ermac, Wendel Oquias, Lloyd Chavez, Willy Medillo ug Macmac Borga.

PUNTOS MATAG USA

Unang duwa:

TONCABS (77) - Suson 20, Herbieto 11, Cabunillas 8, Bukiron 7, Atillo 6, Mahusay 6, Vios 4, Tantuan 4, Ouano 3, Castillo 3, Alcover 3, Catapusan 2, Alquezar 2.

AC Troopers (62) - Templado 12, Sicad 9, Cabahug 8, Taghoy 8, Englis 6, Estremos 6, Placerda 6, Medillo 4, Chavez 2, Oquias 2.

Ikaduhang duwa:

SMILE Dental Clinic (69) - Madrid 20, Palero 13, Ouano 7, Ermac 6, Del Castillo 6, Oljol 4, Alburo 4, Borces 4, Mauro 2, Ramos 2, Ornopia 2.

SEBANDAL (59) - Cinco 12, Asis 10, Bercero 10, Ubas 8, Sebandal 7, Basubas 4, Marababol 4, Abing 2, Ranile 2.

Ikatulong duwa:

MONTERROYO (67) - Grafe 14, Jordan 12, Mendoza 10, Monsanto 9, Canjo 6, Zambo 4, Yu 4, Tañan 4, Virallo 2, Pasaol 2, Alarde 2.

HERMAG Boys (53) - Manzo 16, Borga 12, Dayanan 10, Seno 9, Buenavista 2, Peñas 2, Toycar 2.