Canillas nagpabiling walay pilde; Gonzales, portmen nakaipsot

CEBU, Philippines — Midako ang kahigayonan sa Canillas Customs Brokerage nga moabante sa sunod hugna dihang mihakot na sab kini og daog sa Cebu Aduana Basketball Legends  (CABL) Season 1 niadtong Sabado didto sa Basak gym, Dakbayan sa Sugbo.

Dili basta-basta ang kadaogan sa Canillas Customs Brokerage ni Roy Canillas kay ila man  nga gilubong ang Robbie Trading ni Karl Zapanta sa iskor nga 94-68 alang sa ikalimang sunod-sunod nga daog.

Sa maong daog, ang Canillas pabiling lider sa liga bitbit ang 5-0 nga baraha.

Balanse kaayo ang opensiba sa Canillas ug timaan niini mao nga pito  ka players niini ang miiskor og double figures pinangulohan ni Marvin Sillar nga mikabkab og 16 puntos, gisundan ni Ferdi Sigue sa iyang 15 puntos.

Si Bibit dela Cerna mikolekta og 14 puntos sa Canillas nga milabaw og 10 puntos sa halftime, 36-26.

Sila si Noel Medalle, Toper Marata ug Geryl Bukiron nagtampohay og 11 puntos, samtang si Rex Bensi miamot og 10 puntos sa maong daog.

Sila si  Joseph Jaime, Gilbert Guirit ug Jomar Caynila ang mihirit og double figures sa Robbie Trading nga nalabay sa ikapitong dapit uban ang 1-4 nga baraha.

Midaog sab ang Gonzales Customs Brokerage nilang Art Gonzales ug Richard Rongcales sa sikit kaayo nga duwa batok sa Alin Logistics, 71-70.

Gipangulohan ni Jmark Gornez ang Gonzales nga mikamada og 17 puntos, samtang sila si Jerry Jaca ug Jim Villa  nagkumboya'g 24 puntos sa Gonzales nga maoy naglabaw sa halftime, 45-36.

Tulo sab ka Alin players ang mipugnit og double digits. Si Loreto Castillo mipabuto og 22 puntos, si Javer Deniega miamot og 20 puntos, samtang si Jose Velarde miambit og 11 puntos sa Alin nga pabilin gihapon nga nangiwit sa standing sa ilang 0-6 nga baraha.

Ligas sab kaayo ang duwa tali sa Portmen ni Boodee Monteño ug Jam Customs Brokerage ni Primitivo Mondin.

Ang Portmen midaog lang og dos puntos sa iskor nga 65-63 aron magsolo sa ikaduhang dapit sa standing bitbit ang 4-1 nga baraha.

Lubong og 12 puntos ang Portmen sa halftime, 24-36, apan bisan pa niini, wala sila mawad-i sa paglaum ug padayon nakigsandurot hangtod nga nakuha ang tungason nga kadaogan.

Si James Jordan maoy nangu sa Portmen sa iyang 20 puntos, samtang si Jaymar Elloren mao sab ang nangu sa Jam nga adunay 23 puntos.

Ang liga giorganisar nilang Janno Boniao, Noel Medalle, Ferdinand Sigue, Sidney Ganapin ug Jun Gayo sa abag ni  Roy Canillas isip consultant.

Puntos matag usa

Unang duwa:

GONZALEZ (71) – Gornez 17, Jaca 14, Villa 10, Gayo 7, Aragon 5, Dayon 4, Tan 4, Rongcales 4, Dueñas 4, Robinson 2.

ALIN Logistics (70) – Castillo 22, Deniega 20, Velarde 11, Oporto 9, Baltonado 4, Cañete 2.

Ikaduhang duwa:

CANILLAS (94) – Sillar 16, Sigue 15, Dela Cerna 14, N. Medalle 11, Marata 11, Bukiron 11, Bensi 10, Boniao 4, Banzon 2.

ROBBIE (68) – Jaime 21, Guirit 18, Caynila 15, Villarias 8, Josaphat 2, Sullano 2, Cañal 2.

Ikatulong duwa:

PORTMEN (65) – Jordan 20, Cal 8, Caburnay 8, Regidor 6, Embrado 5, Viador 5, Oyao 4, Bacalla 4, Monteño 3, Espina 2.

JAM (63) – Elloren 23, Mondin 8, Diano 6, Jovita 6, B. Medalle 6, Rodriguez 4, Taladua 4, Cañete 2, Caraballe 2. (BANAT NEWS)