Nurse mo-coach sa Canada

CEBU, Philippines — Lab-as pang migiya sa Toronto Raptors ngadto sa makasaysayanon nilang kampiyonato sa NBA, si Nick Nurse mikompirma sa iyang plano nga mo-coach sa Canadian national team sa umaabot nga Basketball World Cup.

"It's just about done and something I'm really looking forward to doing," matud pa ni Nurse kabahin sa kasabotan nga siya'y mo-coach sa Canada sa maong torneyo nga ipahigayon didto sa China karong Septiyembre.

Si Jay Triano maoy mi-coach sa Canada ngadto sa 27-5 record sa miaging upat ka tuig, apan mikanaog kini sa iyang puwesto tulo pa ka bulan ang milabay.

"I think it's going to make me a better coach," dugang pa ni Nurse nga nagsilbe sab nga assistant coach sa England niadtong 2012  London Olympics.

Si Nurse nga lagmit mao sab ang mo-coach sa Canada sa Tokyo Olympics sunod tuig, nahimong ikasiyam nga rookie coach sa kasaysayan sa NBA nga mitimon sa usa ka team ngadto sa titulo. Gibihag sa Raptors ang two-time defending champion Golden State Warriors sa NBA Finals aron langkaton ang labing unang korona sa 24 ka tuig nga kasaysayan sa ilang prangkisa.

Apil sa mga seguradong kuhaon ni Nurse aron maglangkob sa Team Canada mao sila si Jamal Murray sa Denver Nuggets, Tristan Thompson sa Cleveland Cavaliers ug Dwight Powell sa Dallas Mavericks. (BANAT NEWS)