Raptors gitagna nga makampiyon
Emmanuel B. Villaruel (Banat) - June 16, 2019 - 12:00am

CEBU, Philippines — Dili tiaw ang dalan nga naagian sa Toronto Raptors sa wala pa nila hingpit matungas ang bukid sa kalampusan. Sa unang hugna sa playoffs, miabot og Game- 7 ang ilang serye batok sa Philadelphia 76ers.

Human sa makutas nga kumbati, ang Raptors maoy milugwa nga mananaog, salamat sa alas nilang si Kawhi Leonard nga milansang sa labing unang game-winning buzzer-beater sa usa ka Game-7 sa kasaysayan sa playoffs.

Mao kini ang naghatod kanila sa ikaduhang hugna sa playoffs diin laing lisud nga hagit ang nag-atang kanila batok sa Milwaukee Bucks, ang haring gangis nga koponan nga maoy nagbitbit sa labing nindot nga rekord sa NBA sa regular season.

Gani miaksiyon og tikyaob ang Raptors human sila gisagunsonan og pilde sa Bucks sa nag-unang duha ka duwa sa serye.

Apan sa dihang nagtuo ang uban nga hingpit na silang mosukarap, ang Raptors mipakurat sa kinabag-an pinaagi sa pagpalukapa sa Bucks sud sa upat ka sunod-sunod nga duwa dayon na ngadto sa pagtaak sa NBA Finals sa labing unang higayon sa 24 nga kasaysayan sa ilang prangkisa.

Ning higayona, ang Raptors nagpas-an sa labing bug-at nilang tahas gumikan kay  ang two-time defending champion Golden State Warriors ang ilang kontra, ang gikaintapang koponan nga dominante kaayo ug gikahadlokan sa liga sa miaging upat ka tuig.

Bisan og wala ang superstar  nga si Kevin Durant, inilog gihapon kaayo sa tapad ang Warriors gumikan sa presensiya nilang Stephen Curry, Klay Thompson ug Draymond Green.

Apan armado og tumang determinasyon ug kadasig, ang Raptors milampos pagpiog sa gamhanang Warriors dayon na ngadto sa pagkulit og laing kasaysayan.

Hingpit nga gipalukapa sa Toronto ang Golden State human miposte og 114-110 nga daog sa Game-6 sa NBA Finals niadtong Biyernes sa katapusang duwa sa Warriors didto sa Oracle Arena sa Oakland, California. Ilang gihuman ang serye sa baraha nga 4-2 aron mahimong labing unang team gawas sa Amerika nga milangkat og NBA title.

Ang nakab-ot nga kalampusan sa Raptors daw nasuwat nang daan sa ilang mga palad. Gitagna  sila nga makampiyon, butang nga pormal nilang iselebrar pinaagi sa usa ka bongga ug engrandeng parada karong Lunes didto sa kadalanan sa Toronto agi'g pasalamat na sab sa ilang mga fans nga wa'y puas   misuporta kanila.

RAPTORS
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with