Game 6 karon

CEBU, Philippines — Laraw sa Toronto Raptors nga mokulit og kasaysayan sa ilang prangkisa, samtang ang Milwaukee Bucks nanghinaut nga makaangkon og laing kinabuhi sa ilang panag-abot alang sa Game-6 sa NBA Eastern Conference finals karong alas-8:30 sa buntag didto sa Scotiabank Arena sa Toronto, Canada.

Gipayaka sa Milwaukee ang Toronto sa nag-unang duha ka duwa sa series, apan giharos og daog sa Raptors ang sunod nga tulo ka duwa aron pagposte og 3-2 nga bentaha ug pagtikang ngadto sa usa na lang ka daog aron moabante sa NBA Finals sa labing unang higayon.

Mahimong kab-uton sa Raptors ang ilang damgo kun ilang tiwasan ang Bucks karon didto sa ilang korte, butang nga gipangandaman sa ilang superstar nga si Kawhi Leonard. "I enjoy it," matud pa ni Leonard nga duha ka higayon nahimong NBA Defensive Player of the Year ug maoy Finals MVP sa dihang ang San Antonio Spurs nakampiyon niadtong 2014.

"Just trying to win, either if it's me scoring points or getting my teammates wide-open looks, just out there trying to win. It's not really about me scoring, it's just about being aggressive and don't shy away from anything."

Tataw nga si Leonard maoy naghatag sa labing dako nga problema sa kampo sa Bucks. Mi-average siya og 31.4 points, 8.4 ka rebounds, 3.6 ka assists ug 1.5 steals sa playoffs, statistics nga klarong nakapalisang sa Bucks.

Gawas ni Leonard, ang Bucks daghan pa'g atimanon sa habig sa Raptors, apil na sila si Pascal Siakam, Kyle Lowry, Marc Gasol, Normal Powell, Serge Ibaka, Danny Green ug Fred VanVleet nga maoy usa sa mga mipatay sa Milwaukee sa Game-5.

Aron maduso nila ang serye ngadto sa tibuok rota sa 'best-of-seven' series, ang Bucks nangi-nahang-lan og impre-sibong salida sa ilang mga bitoon nga naglangkob nilang Giannis Antetokounmpo, Khris Middleton, Brook Lopex, Nikola Mirotic, George Hill, Eric Bledsoe, Ersan Ilyasova ug Malcolm Brogdon.

Apan angayan nga mangandam ang Bucks kay seguradong makigpatay man ang Raptors aron tapuson ang serye atubangan sa bagang panon sa ilang fans didto sa ilang korte.