LeBron 'mi-like' ni Irving nagsul-ot uniporme sa Lakers

CEBU, Philippines — Bukas sa posibilidad si LA Lakers superstar LeBron James nga makig-uban og balik sa kanhi niya teammate sa Cleveland Cavaliers nga si Kyrie Irving.

Kini kun ang iyang reaksiyon sa Instagram maoy basihan. Gumikan kay si James 'mi-like' sa gimaniobrang hulagway ni Irving nga nagsul-ot og uniporme sa Lakers.

Gipistahan dayon og reaksiyon sa iyang mga fans ang gibuhat ni James diin ang uban mipasumbingay pa gani nga kompirmado nang mobalhin sa LA si Irving gikan sa Boston Celtics gumikan sa gihimong pag-like sa four-time MVP.

Sa kasam-tangan, si James anaa sa proseso pagpangita og dekalibreng free agent aron idugang sa ilang puwersa sa sunod nga NBA season.

Bisan pa sa presensiya ni James, ang Lakers nagkagidlay gihapon ug wala gani makaabante sa playoffs ning NBA season.