CESAFI Partner's Cup sugdan Hunyo 2
CEBU, Philippines — Upat ka mga duwa ang masaksihan sa pagbukas sa 2019 Cebu Schools Athletic Foundation, Inc. (CESAFI) Partner's Cup karong Hunyo 2 diha sa Cebu Coliseum.
Sa pasiunang duwa nga gikatakda sa alas- 12:30 sa udto, ang Sacred Heart School-Ateneo de Cebu (SHS-Adc) Magis Eagles makigtigi sa University of Southern Philippines Foundation (USPF) Baby Panthers, samtang ang reigning CESAFI juniors champion University of Cebu (UC) Junior Webmasters makigharong sa ilang sister-team nga UCLM sa alas-2 sa hapon.
Sa aksiyon sa collegiate division, ang UC Webmasters makigbugno sa USPF Panthers sa alas-3:30 sa hapon sa dili pa mag-abot ang University of San Carlos (USC) Warriors ug Southwestern University (SWU)-Phinma Cobras sa main game sa alas-5 sa hapon.
Ang defending CESAFI champion University of the (UV) Green Lancers unya pa moduwa sa Hunyo 4 batok sa University of San Jose-Recoletos (USJ-R) Jaguars sa tataw nga kulbahinam nga rematch sa miaging CESAFI Finals.
Ang duha ka bulan nga liga magsubay og single round robin format sa juniors level ug double round robin sa college.
Ang top 4 moabante sa crossover semifinals diin ang top 2 teams maka-angkon og twice-to-beat advantage. Ang mga modaog maoy mag-ilog sa kampiyonato sa usa ka best-of-three series.
- Latest
