Raptors labaw na

CEBU, Philippines – Gipilde na sab sa Toronto Raptors ang Milwaukee Bucks, 105-99 ug usa na lang ka daog ang ilang gikinahanglan aron moabante sa NBA Finals sa labing unang higayon sa kasaysayan sa ilang prangkisa.

Nagmangtas si Kawhi Leonard sa katapusang kuwarter diin miposa siya og 15 sa iyang 35 puntos aron mangulo sa maong daog.

Human nahagba sa nag-unang duha ka duwa sa serye, ang Raptors nakabawi sa mosunod nga tulo ka duwa aron pagposte og 3-2 nga bentaha sa ilang 'best-of-seven' series.

Mahimong tapuson sa Raptors ang Bucks sa Game-6 nga adto duwaon sa ilang korte karong Domingo. Kun molampus, sangkaon sunod sa Raptors ang two-time defending champion Golden State Warriors sa NBA Finals nga mosikad karong Mayo 31.

Si Leonard mitali og dili momenos 30 puntos sa ika-11 nga higayon sa playoffs. Milansang siya og lima ka tres, milangkat og pito ka rebounds ug mipasa og siyam ka assists.

Dako sab og natampo si Fred VanVleet nga miposa og unom ka 3-pointers sa iyang 21 puntos. Misalida sab sila si Pascal Siakam ug Kyle Lowry alang sa Raptors. Si Siakam mihipos og 14 puntos uban ang 11 ka rebounds, samtang si Lowry mikadlit og 17 puntos.

Si Giannis Antetokounmpo mikolekta og 24 puntos, si Eric Bledsoe dunay 20 puntos, samtang si Malcolm Brogdon mihipos og 18 puntos ug 11 ka rebounds alang sa Bucks nga mikolapso human milabaw og 12 puntos sa ikatulong kuwarter.

Ang Raptors abante lamang og dos puntos sa nahibilin nga 59 segundos sa duwa, apan si Gasol mipasud og usa ka free throw ug dayon si Siakam mihansak sa bola sa himalatyong segundos   nga maoy nagsilyo sa krusyal nga daog sa Toronto.