Kampiyon nga dunay kasingkasing

CEBU, Philippines — Ang Talisay City Aquastars wala lamang makasamit og duha ka sagunson nga kampiyonato sa 2019 Governor's Cup Inter-Cities and Municipalities Under 21 Developmental Basketball Tournament, nakadaog sab sila og kasingkasing gumikan kay nakatandog sila sa kinabuhi sa uban ilabi na niadtong nanginahanglan.

Ubos sa inisyatiba sa Talisay City Sports Commission, ang Aquastars mogahin og tipik sa P500,000 nilang ganti ngadto ni Niño Vin Clark Jugan, ang magduduwa sa Consolacion Sarok Weavers nga nakigbatok sa iyang kinabuhi gumikan sa kritikal nga sakit sa kasingkasing.

Wala masayri sa uban, ang mga Talisaynons mihikap sa matinabangon nilang mga kamot ngadto sa nasakit nga Consolacion player pipila ka semana sa wala pa sila molampos pagdepensa sa ilang titulo niadtong Mayo 11 diin ilang gibuntog ang Mandaue City Ballers, 74-69, sa ‘do-or-die’  game sa ilang  best-of-three finals diha sa University of San Carlos (USC) main gym.

Nagsugod ang tanan sa dihang si Jeanneth Villagonzalo sa Talisay sports commission nakadawat og tawag gikan ni Consolacion head coach Paul Alelu Flores sa hinapos nga bahin sa Abril. Gipahibawo siya ni Flores sa kondisyon ni Jugan nga nasuta sa mga doktor nga dunay heart enlargement.

"Sa pagtawag ni coach Alelu about Clark, without second thoughts misangon mi nga motabang ang Talisay niya," matud pa ni Villagonzalo. "Apan kay bawal man mi magpapulta sa duwa, nangita ko og laing paagi. Mao to nga naghimo dayon ko og donation box nga dunay pangan ni Clark, ako gibutang kilid sa among gym, ug among ipasa-pasa sa crowd atol sa halftime."

Una kini nilang gibuhat atol sa ilang knockout semifinal game batok sa Balamban Shipbuilders niadtong Abril 30 ug dayon sa Game 1 sa ilang best-of-three title series batok sa Mandaue niadtong Mayo 3.

Sa maong mga duwa diin sila midaog, si Villagonzalo nagkanayon nga nakakolekta gyud sila og kantidad nga personal nilang gitunol ngadto sa pamilya ni Jugan.

"Sa akong opinion, ang tawong nagkinahanglan og tabang tabangan gyud. It is better to give than to receive. It's a great achievement to help others," dugang pa ni Villagonzalo.

Gidan-agan pa og samot sa Aquastars ang dalaygon nilang binuhatan sa dihang si Talisay City Councilor Rodi Cabigas mipahibalo human makapanalipod sa ilang trono nga modonar sila og kantidad gikan sa ilang premyo aron makaabag sa medikal nga balayronon ni Jugan.

"Mas nindot gyud ang atoang pamati kon makatabang ta sa uban labi na niadtong nanginahanglan. Usa kana ka hiyas sa kinabuhi nga dili kabayran," sumala pa ni Cabigas.

Sa iyang bahin, si coach Alelu Flores nagkanayon nga daw sa nahutdan siya og pulong kabahin sa naglagiting nga suporta nga ilang nadawat alang ni Jugan.

"Sa dihang nahibawo ko sa kondisyon ni Jugan, nangayo dayon ko og pinansiyal nga hinabang sa mga tawo nga akoang kaila. Naluoy gyud ko sa akoang player kay pobre man tawon ni ilang pamilya. Taxi driver iyang papa ug housewife ra iyang mama. Kimaguwangan siya sa lima ug naa pa gyud down syndrome ila kamanghuran," nagkanayon si Flores.

"Mao nang mapasalamaton kaayo ko sa mga misangon sa akong panawagan. Ang tanang nga assistance ngadto sa pamilya ni Clark dako gyud og natabang sa ilang kahimtang," dugang pa ni Flores. "Dili man nako manganlan silang tanan but dili namo mahikalimtan ang tanang tawo nga misuporta sa amo fund-raising labi na sa mga malumo nga kasingkasing sa taga-Talisay ug Mandaue ug ingon man sa mga tawo luyo sa Cebu Provincial Sports Commission."

Ang pamilya ni Jugan mipadayag sab sa wa’y sukod nilang pasalamat sa mga matinabangon nga mga tawo nga nahimo nilang sandiganan ning panahon sa ilang kalisdanan.

"Una sa tanan, mapasalamaton ko sa Ginoo sa paghatag niya og mga tawo nga gihimo niyang instrumento aron katabangan mi. Daghang salamat sa kinailawman nga bahin sa among kasingkasing," matud pa sa amahan ni Clark nga si Agvin P. Jugan.

Segun sa karaang panultihon nga ang pagtabang sa uban maoy unang lakang ngadto sa paghulma og usa ka maanindot nga kalibotan. Mao kana ang naghimo sa Talisay Aquastars nga dalaygong kampiyon sud ug gawas sa korte nga angay sundon ug isangyaw sa kadaghanan.