Pelicans maoy unang mopili sa NBA draft

CEBU, Philippines – Midaog ang New Orleans Pelicans sa NBA draft lottery kagahapon ug duna sila'y purohan nga mohimo ni collegiate superstar Zion Williamson isip maoy top pick karong Hunyo 20.

Ang New York Knicks, Cleveland Cavaliers ug Phoenix Suns parehong dunay 14 porsiyento nga kahigayonan nga mokuha sa No. 1 selection ubos sa sistema nga naghatag og patas nga tsansa nga modaog sa lottery alang niadtong mga teams nga nagkupot sa labing bati nga rekord sa liga.

Sayes porsiyento ra unta ang tsansa sa Pelicans nga modaog sa lottery, apan nabuligan sila sa maayong palad kay nalandig man sa ilang mga kamot ang umaabot nga No. 1 overall pick. Ang No. 2 adto mapunta sa Memphis Grizzlies, ang No. 3 sa Knicks ug ang No. 4 sa Los Angeles Lakers.

Si Williamson interesadong misaksi sa draft lottery nga didto gipahigayon sa Chicago gumikan kay gitagna na man daan nga siya maoy unang birahon sa draft gumikan sa impresibo niyang salida sa unang season pa lamang niya sa Duke University Blue Devils diin siya mi-average og 22.6 points ug 8.9 rebounds matag duwa.