Celtics misilhig sa Pacers

CEBU, Philippines — Mikabkab og 20 puntos si Gordon Hayward sa dihang gi-sweep sa Boston Celtics ang Indiana Pacers, 110-106  aron maoy labing unang team nga miabante sa ikaduhang hugna sa NBA playoffs.

"Any time you 4-0 a team, you feel great," matud pa ni Hayward. "We're going to heal up a little bit and be ready for the next round."

Mao kadto ang labing unang series sweep sa Celtics sukad niadtong 2011.

Ilang sangkaon sunod ang modaog sa serye tali sa Milwaukee Bucks ug Detroit Pistons. Ang Bucks nagkupot og 3-0 nga bentaha ug lagmit silhigon sab ang Pistons karong adlawa.

Dako sab og natampo sa Celtics si Marcus Morris uban ang 18 puntos ug walo ka rebounds.

Dili maayo ang gipakitang labok nilang Kyrie Irving ug Al Horford, apan bisan pa man niini nakatabang gihapon sila sa kawsa sa Celtics. Si Irving mihipos og 14 puntos ug pito ka assists, samtang si Hayward midonar og 14 puntos ug 12 ka rebounds.

Ang Pacers igo lamang nakalabaw, 82-80 gumikan kay ang Celtics milusad og 15-3 run aron kontrolahon ang duwa sa hingpit.

Sa laing mga duwa, ang Golden State Warriors ug ang Toronto Raptors parehong nanuktok sa ikaduhang hugna sa playoffs human miposte og 3-1 nga bentaha batok sa tagsa-tagsa nila ka mga kontra.

Sila Kevin Durant ug Klay Thompson mituboy sa Warriors ngadto sa 113-105 nga kadaogan batok sa LA Clippers 113-105, samtang si Kawhi Leonard mibida sa dihang gilubong sa Raptors ang Orlando Magic, 107-85.

Si Durant mihipos og 33 puntos, samtang si Thompson mikadlit og 27 sa iyang 32 puntos sa first half. Ang pagpanginit nilang Durant ug Thompson igo kaayong nakatapak sa kabugnaw ni Stephen Curry nga mirehistro lamang og 12 puntos.

Didto sa Orlando, si Leonard mipabuhagay og 34 puntos sa dihang gilubong sa Raptors ang Magic og 22 puntos. Si Leonard gipaluyohan nilang Pascal Siakam ug Norman Powell nga parehong mitali og 16 puntos. (BANAT NEWS)