Casimero kampiyon pagbalik

CEBU, Philippines — Sa eksplosibong Dominggo sa Pagkabanhaw alang sa kalibutan sa boksing diin gidominar ni Terence Crawford si Amir Khan ug gikastigo ni Danny Garcia si Adrian Ganados, ang Pinoyng boksidor nga si John Riel Casimero mihimo sa kaugalingon niyang kasikas nga gikalipay og maayo sa iyang mga kababayan.

Ang garbo sa Ormoc City mikulit og dalaygon nga kadaogan pinaagi sa 12th round knockout batok sa Mehikanong si Ricardo "Hindu" Espinosa aron sakmiton ang WBO interim bantamweight title kagahapong adlawa didto sa Dignity Health Sports Park sa Carson, California.

Ang 30-anyos nga si Casimero nakigduyog na karon sa mga halangdong pangan nga naglangkob nilang Manny Pacquiao, Nonito Donaire ug Donnie Nietes isip mao lamang mga Pinoyng boksidor sa kasaysayan nga nakadaog og tulo ka world titles sa managlahing weight division.

Si Casimero kanhi naghari isip IBF light flyweight ug IBF flyweight champion.

"Gusto naklong sangkaon sunod si Tete," matud pa ni Casimero, nga miinat sa iyang record ngadto sa 28-4 uban ang 19KOs. Si Espinosa natagak ngadto sa 23-3 (20KOs).

Mao kana ang ensaktong direksiyon nga padulngan ni Casimero kay ang iyang kadaogan naghatag kaniya og katungod nga mohagit ni regular WBO bantamweight champion Zolane Tete sa South Africa.

Hinoon maghuwat una si Casimero kay si Tete gikatakda pa man nga makigbinukbukay ni Donaire, ang reigning WBA super bantamweight champion, sa usa ka World Boxing Super Series unification bout karong Abril 27 didto sa Cajundome sa Lafayette, Louisiana.