Garcia mihagit ni Pacquiao sa usa ka sangka

CEBU, Philippines — Si Danny Garcia midiga og dominanteng inawayan batok ni Andrian Granados kagahapon didto sa Dignity Sports Park sa Carson, California aron pagpakita sa iyang kaandam nga harongon ang labing bug-at nga mga pangan karon sa welterweight division apil na si Shawn Porter nga maoy mipatilaw sa katapusan niyang pilde.

Human namulso sa nag-unang tres minutos sa aksiyon, si Garcia mi-arangkada sa iyang opensiba sa ikaduhang hugna hinungdan nga gitumba niini si Granados duha ka higayon. Una gamit ang mahait nga wala ngadto sa apapangig ug dayon ang makabungog nga right straight.

Sukad niadto, klaro na kaayong way padaog si Granados ug gipaabot na lang ang ensaktong panahon kanus-a siya matikangkang sa hingpit.

Gipalukapa og usab ni Garcia si Granados sa ikalimang hugna gamit ang hagpok nga kombinasyon ug sa ikapitong hugna, iya na sab nga gidabo-dabo og kulata ang nakagidlay niyang kontra nga maoy nakapaaghat ni reperi Thomas Taylor nga undangon ang away.

"I'm back,” siyagit pa ni Garcia agig pagselebrar sa impresibo niyang kadaogan.

Sa post-fight interview, si Garcia way pugong-pugong nga namahayag nga si Pinoy ring star Manny Pacquiao, ang kasamtangang WBA welterweight champion, maoy usa sa gusto niyang makasangka sunod.

Iya sab nga gisaytan ang rematch batok nilang Porter o Keith Thurman, ang duha ka mga boksidor nga nakapilde kaniya sa parehong sikit nga desisyon.