Hotshots tuyo nga mutabla sa serye
CEBU, Philippines — Human sila makalihay sa 0-3 nga pagkalubong, ang Magnolia Hotshots gusto nga mutabla sa serye batok sa Rain or Shine Elasto Painters sa Game 4 sa ilang best-of-seven semis series karong gabii didto sa Smart Araneta Coliseum.
Sa wala pa ang taas nga pahuway tungod sa Semana Santa, ang Magnolia midaog, 85-74, sa Game 3 diin napakita nila nga desidido sila nga mubalik sa serye batok sa Rain or Shine.
Si Hotshots coach Chito Victolero nagpasalamat tungod kay nakapahuway iyang mga players nga gipangkapoy na tungod usab kay niagi pa sila og malisud nga dalan paingun sa semis.
Si Magnolia ace guard Paul Lee nagkanayon nga ganado sila paingun sa sangka karon ilabi na nga anaa kanila ang momentum. "At least ito yung momentum naming nanalo kami andiyan na." matud pa ni Lee sa PBA.com. "So malaking factor talaga itong break na nakuha namin."
Si Lee kinsa nag-average og 14.6 points sa serye, miingon nga mahinungdanon nga makuha nila ang daog karon tungod kay lisud usab kung mabutang sila sa 3-1 nga biya kung mapilde sila sa Painters.
Ang Painters sa ilang bahin gihamok sa injuries nga naglakip sa ilang mga sinaligan nga sila si Maverick Ahanmisi ug Raymund Almazan, apan nagpabilin kini nga delikadong koponan tungod usab sa presensya nila ni Ed Daquioag, Beau Begal, James Yap ug rookie Javee Mocon.
- Latest
