Celtics 3-0 na batok Pacers

CEBU, Philippines — Midistansiya na og maayo ang  Boston Celtics dihang ilang giusban og pilde ang Indiana Pacers, 104-96 aron pagposte og 3-0 nga bentaha sa ilang NBA first-round playoff series.

Si Jaylen Brown mi-iskor og 23 puntos ug si Kyrie Irving mitampo'g 19 puntos  sa Celtics nga  kinahanglan na lang og usa ka daog aron moabante sa ikaduhang hugna sa Eastern Conference playoffs kun ilang mausban og parot ang Pacers karong Lunes didto gihapon sa teritoryo sa ilang kontra.

Si Tyreke Evans mihipos og 19 puntos, samtang si Bojan Bogdanovic mitali og 15 puntos, apan dili kini igo aron paglikay sa Pacers nga makatilaw sa ikaunom niining sagunson nga pilde batok sa Celtics gikan pa sa regular season.

Didto sa Oklahoma City, si Russell Westbrook mipatuasik og 33 puntos ug 11 ka  assists  sa dihang ang Thunder nakapanimalos sa Portland Trail Blazers, 120-108. Hinuon naglabaw pa gihapon sa serye ang Blazers, 2-1.

Wala sab magpaalkansi si Paul George nga dunay 22 puntos ug ingon man sila si Jerami Grant ug Dennis Schroder nga nagkumbinar og 35 puntos alang sa Thunder.

Si Damian Lillard mikabkab og 32 puntos, apan naangklahan ngadto lamang sa tres puntos sa katapusang kuwarter hinungdan sa pagkatibugsok sa Blazers.

Sa lain pang resulta, si Pascal Siakam mihipos og 30 puntos ug 11 ka rebounds ug si Kawhi Leonard miamot og 16 puntos sa Toronto Raptors nga mipakaging sa Orlando Magic, 98-93  aron pagposte og 2-1 nga bentaha sa kaugalingon nilang serye.

Dako sab og natampo sa Raptors si Danny Green nga dunay 13 puntos ug Kyle Lowry  nga mitapos uban ang 12 puntos ug 10 ka assists.