Lue nakigtagbo sa Lakers

CEBU, Philippines — Usa ka pamilyar nga dagway sa kagahapon ni LeBron James ang nakigtagbo sa  kadagkoan sa Los Angeles Lakers.

Segun sa taho ni Adrian Wojnarowski sa ESPN.com, si coach Tyronn Lue nakigtagbo uban ni Lakers general manager Rob Pelinka kagahapon diin ilang gihisgutan ang posisyon nga nabakante sa pagkatagak ni Luke Walton. Si Lue maoy ikaduhang kandidato nga nahimamat ni Pelinka sunod ni Philadelphia 76ers assistant coach Monty Williams.

Gawas nilang Lue ug Williams, nagpa-interbiyu sab sa Lakers si Miami Heat assistant coach Juwan Howard. Si Howard teammate ni James sa dihang nagduwa pa sila sa Miami Heat ug teammate usab ni Pelinka sa dihang nagduwa pa sila sa kolehiyo ubos sa University of Michigan.

Sa pagka karon, ang Lakers padayon pang nangita og coach human ilang gipalagpot si Walton usa ka semana ang milabay.