Trail Blazers 2-0 na

CEBU, Philippines — Miiskor na sab og daog ang Portland Trail Blazers dihang ilang gipahilom  pag-usab ang Oklahoma City Thunder, 114-94 aron pagposte og 2-0 nga bentaha sa ilang NBA  first-round playoff series kagahapon didto sa Moda Center sa Portland, Oregon.

Si CJ McCollum  mipabuhagay og 33 puntos ug si Damian Lillard mikandos og 29 puntos sa ilang paglubong sa Thunder.

Nanginit sab si Maurice Harkless dihang mitali siya og  14 puntos ug siyam ka rebounds alang sa Blazers nga misugod sa playoff series pinaagi sa duha ka sagunson nga daog sa labing unang higayon sukad niadtong 2014 playoffs diin ilang gitagak ang Houston Rockets sud sa unom ka duwa.

Ang series motapon  didto sa Oklahoma City alang sa Game-3 karong Sabado.

Si Paul George nakahimo pagkadlit og 27 puntos bisan pa man og dunay gibatyag sa tuo niyang abaga, samtang si Russell Westbrook mihipos lang  14 puntos, walo ka rebounds ug 11 ka assists sa nahilom nga Thunder.

Sa laing mga duwa, ang Toronto Raptors ug ang Denver Nuggets dali nga nakapanimalos sa tagsa-tagsa nila ka mga karibal aron pagtabla sa serye, 1-1.

Si Kawhi Leonard mi-iskor og 37 puntos, samtang si Kyle Lowry mitali og 22 puntos sa dihang gilabhan sa Raptors ang Orlando Magic, 111-82.

Dako sab og natampo si Pascal Siakam nga dunay 19 puntos ug 10 ka rebounds alang sa dominanteng Raptors nga   sa usa ka higayon nilabaw og 34 puntos, 104-73.

Didto sa Pepsi Center sa Denver, Colorado, si Jamal Murray nasipyat sa nag-una niyang walo ka itsa, apan namawi sa katapusang kuwarter diin siya mipugnit og 21 sa iyang 24 puntos aron pangulohan ang Nuggest ngadto sa 114-105 nga kadaogan batok sa San Antonio Spurs.

Ang Nuggets nameligro nga masagunsonan og duha ka pilde sa ilang korte human maalkansi og 19 puntos sa hinapos nga bahin sa ikatulong kuwarter, 78-59, apan ilang gitapos ang duwa pinaagi sa  55-27 run aron pagpukan sa Spurs,.

Si Paul Millsap mitampo og 20 puntos sa Nuggets, samtang si Nikola Jokic diriyot makahimo sa ikaduha niyang 'triple-double' ning serye uban ang 21 puntos, 13 ka rebounds ug walo ka assists.