Curry ikatulo nang all-time scorer sa GSW
CEBU, Philippines — Miburak og 40 puntos si Stephen Curry ug dayon mitikang sa ikatulong dapit sa listahan sa Golden State Warriors all-time scorers human gibuntog ang Cleveland Cavaliers, 120-114 sa NBA kagahapong adlawa didto sa Oracle Arena sa Oakland, California.
Si Draymond Green miamot og 20 puntos ug walo ka rebounds, si Kevin Durant dunay 15 puntos ug walo ka assists, samtang si Quinn Cook mitampo og 14 puntos alang sa Warriors nga nagpanilap nang malugwa nga top-seed sa Western Conference bitbit ang 55-24 record.
Nadoble ang pagmaya ni Curry kay nagsunod na man siya karon nilang Wilt Chamberlain (17,783) ug Rick Barry (16,447) sa listahan sa mga Warriors nga nakatigum og labing daghan nga puntos sa ilang karera nga miabot na karon og 16,283 puntos.
Ang Warriors nanginahanglan na lang karon og usa ka daog ug dili ba usa ka pilde sa sikit nilang karibal nga Denver Nuggets aron hingpit na nilang maangkon ang numero unong puwesto sa Western Conference.
Wala sab magpabitin ang Nuggets nga mibira sa korona sa Northwest Division human gipaksit ang Portland Trail Balzers as iskor nga 119-110.
Si Nikola Jokic mihipos og 10 sa iyang 22 puntos sa katapusang kuwarter, samtang si Paul Millsap mikabkab og 25 puntos alang sa Nuggets nga misakmit sa labing una nilang division title sud sa unom ka tuig.
- Latest