James, Lakers hingpit na nga natagak
CEBU, Philippines — Walay LeBron James nga moduwa sa NBA playoffs sa labing unang higayon human ang Los Angeles Lakers hingpit na nga natagak dihang napilde kini ngadto sa Brooklyn Nets, 106-111 kagahapon didto sa Staples Center sa Los Angeles, California.
Una kining higayon nga si James mapalta sa playoffs sukad niadtong 2005.
Ang four-time MVP nga si James nga miduwa sa NBA finals sud sa walo ka sunod-sunod nga season, igo na lang magsud-ong samtang mahitabo ang playoffs.
"It is a tough season for all of us," matud pa ni James sa Agence France Presse. "It is not what we signed up for".
Kini usab ang ikaunom ka sunod-sunod nga season nga dili makasud sa playoffs ang Lakers nga napuno sa mga pagsuway karon sama sa injuries, suspensions. Pakyas sab sila pagkuha sa All-Star ni Anthony Davis gikan sa New Orleans Pelicans pinaagi unta sa usa ka trade.
Si James mipakita gihapon sa iyang abilidad kagahapon dihang mirehistro siya og 25 puntos, 14 ka assists ug siyam ka rebounds, apan dili kini igo aron tabangan ang Lakers nga kaduha lang nidaog sa katapusang 13 nila ka duwa.
Samtang didto sa Toyota Center sa Houston, Texas, si reigning MVP James Harden mipabuto og 61 puntos alang sa Rockets nga mipitlok sa San Antonio Spurs, 111-105.
Ikawalo kining higayon karon nga season nga si Harden miiskor og dili momenos 50 puntos.
Sa ubang mga duwa, ang Milwaukee Bucks mipabugnaw sa Miami Heat, 116-87, ang Oklahoma City Thunder mipakurat sa Toronto Raptors, 116-109, ang Denver Nuggets milubong sa New York Knicks, 111-93, ang Orlando Magic mipanit sa Memphis Grizzlies ug ang Los Angeles Clippers mipatapsing sa Cleveland Cavaliers, 110-108.
- Latest