Guiao midayeg og maayo ni Blatche
CEBU, Philippines — Gidayeg og maayo ni Gilas coach Yeng Guiao ang naturalized center nga si Andray Blatche nga usa sa mga yawi sa 84-46 nga kadaogan sa Pilipinas batok Qatar sa miaging kaadlawon didto sa Al-Ghafara Sports Club sa Doha, Qatar.
Manghinaut si Guiao nga magpabilin ang kalagsik ni Blatche sa sangka nila batok sa Kazakhstan karong Domingo.
Si Guiao nga wala mikuha ni Blatche sa miaging leg diin kaduha gyud napilde ang Gilas sa ilang homecourt, miingon nga ang 6-foot-11 American mipakita og talagsaong kalagsik ug kondisyon. Matud pa ni Guiao nga seryoso gyud si Blatche nga motabang Pilipinas nga makasud sa World Cup.
Gibarugan ni Blatche ang iyang saad nga ibuga ang tanan niyang kusog sa nahibiling duha ka duwa sa Gilas batok Qatar diin mitampo siya sa tanang aspeto sa duwa lakip na sa outside shooting ug depensa.
Ang Gilas moabot karong adlawa didto sa Kazakhstan alang sa katapusan nilang duwa sa qualifiers karong Domingo.
Kinahanglan nga dag-on sa Gilas ang krusyal nga duwa kay kun mapakyas mao kini ang motak-op sa pultahan sa World Cup.
- Latest
