Gilas mipuhag sa Qatar

CEBU, Philippines —  Gilat-an og maayo sa Gilas Pilipinas ang kontra nilang Qatar, 84-46 sa 2019 FIBA World Cup qualifiers sa miaging kaadlawon didto sa  Al-Ghafara Sports Club sa Doha, Qatar.

Gumikan niini, usa na lang ka daog ang kinahanglan sa Gilas aron makaangkon og luna sa 2019 World Cup. 

Sunod sulngon sa Gilas mao ang  Kazakhstan karong Domingo diin magdepende ilang kapalaran kun  makaduwa ba sila sa World Cup sa hinapos nga bahin ning tuiga didto sa China.

Gawas sa katugnaw, ang Gilas magpas-an og dakong bagahi kay napilde man sila sa Kazakhstan sa una nilang panag-abot niadtong Disyembre sa miaging tuig didto sa Mall of Asia (MOA) Arena.  

Ang ex-Brooklyn Nets cager nga si Andray Blatche mirehistro og team-high 17 puntos ug milangkat og 15 ka rebounds, samtang si Marcio Lassiter miamot og 14 puntos.

Laing naka-double digits sa Gilas mao si Paul Lee nga miambit og 13 puntos, Jayson Castro sa iyang 11 puntos ug Japeth Aguilar nga adunay 10 puntos. 

Gikan sa 10 puntos nga labaw sa halftime, 31-21, ang Gilas mipakita sa ilang kabangis dihang  gilumsan nila sa opensa ang Qatar. Ang Gilas mirehistro sa labing dako nilang labaw sa iskor nga 62-28 sa nahibiling dos minutos sa third period.