16th Thirsty football cup mosikad karon
CEBU, Philippines — Katloan ug siyam ka teams gikan sa upat ka managlahing dibisyon ang magsangka sa unang adlaw sa 16th Thirsty Football Cup karong adlawa diha sa Cebu City Sports Center.
Ang mga duwa nga dungan sugdan sa alas-5 sa hapon naglangkob sa girls 15, mixed open, boys 19 ug 40-above category.
Gitagana ang pitch No. 1 alang sa girls 15. Ang Group 1 naglangkob sa Saint Theresa's College, Bright Academy, Matrix United FC ug STEFTI Braves, samtang ang Sacred Heart School-Ateneo de Cebu, Sheba FC ug Hermanas FC napundok sa Group 2.
Ang kumbati sa mixed open mahitabo sa pitch no. 2, diin ang Sangkay FC, RG Barkadahan, Navi FC, Sore Eyed Eagles ug Tacloban FC nabutang sa Group 1 ug ang Don Bosco Alumni, Foobu, Bergens FC ug Baybay Bag-ids FC sa Group 2.
Napulo'g siyam ka koponan ang magtigi sa boys 19 age-group. Gibahin sila sa upat ka grupo nga magpinaksitay sa pitch No. 3 ug No. 4.
Ang Group 1 gilangkuban sa Don Bosco Braga, University of San Carlos B, Illongo Young Booters FC, Los Miembros, MJS Cazador FC, samtang ang Don Bosco Torre, SHS-AdC, CST-R, Tabor Hill FC, ug FC Cometas napuwesto sa Group 2.
Sa Group 3 mao ang Don Bosco Baglieri, CIS, Bright Academy ug Athletico de Cebu, samtang ang USC A, University of Southern Philippines Foundation (USPF), PFC ug Estudiantes FC anaa sa Group 4.
Sa 40-above, lima ka teams ang mag-engkuwentro alang sa titulo. Kini mao ang Don Bosco Alumni A, Don Bosco Alumni B, USC Alumni, Waray FC ug ERCO FC.
- Latest
