Rambol sa PBA; USA na-ospital

CEBU, Philippines — Gipaubos karon sa imbestigasyon sa  opisyales sa PBA ang nahitabong rambol atol sa practice game tali sa Columbian Dyip ug NorthPort Batang Pier niadtong Martes.

Gikataho nga nagsukmagay ang mga magduduwa sa duha ka koponan atol sa usa ka play.

Bisan pa og usa ra ka practice game, nagkainitay ang star sa NorthPort nga si Stanley Pringle ug sentro sa Columbian nga si Jay-R Reyes.  Nauwang pa ang karambola sa  duha, apan  mibalik ang lamok-lamok sa dihang gisukmag ni  Mo Tautuaa si Reyes nga nakaangkon og gisi sa ilong.

Ang veteran bigman sa Dyip  gidala sa Cardinal Santos Hospital sa kaulohan aron  matambalan ang  pagdugo sa ilong niini.

Bisan pa og wala kini mahitabo sa usa ka opisyal nga PBA game, ang  kadagkoan sa PBA  mopahamtang gihapon og silot sa nahitabong kagubot.