Pacquiao mitambag sa iyang anak nga mopalayo sa boksing

CEBU, Philippines — Gitambagan ni  Pinoy ring star Manny Pacquiao ang   iyang kinamaguwangang anak nga molikay sa boksing human ang 19-anyos niyang liwat nakapahilak sa inahan niini.

Matud pa ni Pacquiao nga aron dili ma-engganyo ang ilang mga anak nga magboksing, siya ug ang kapikas niyang si Jinkee nakahukom nga dili magbutang og gloves ug uban pang ekipo sa boksing sa ilang panimalay.

Gani iya nang gi-awhag ang anak niyang si Emmanuel Jr. nga mas nailhan nga Jimuel, nga mopili og laing dalan nga gusto niyang pagabuhaton sa kinabuhi puwera na lang sa boksing.

Sa dihang nahinabi sa ABS-CBN News, si Pacquiao miangkon nga nasakitan siya nga nagsud-ong sa iyang anak nga gustong magboksing gumikan kay sayod siya kun unsa kalisud ang kinabuhi sa usa ka boksidor.

Gipasabot ni Pacquiao nga napugos siya pagboksing kaniadto aron mahaw-as ang iyang pamilya gikan sa tumang kawad-on, apan sa ilang estado karon, dili na kini angayan pang buhaton sa iyang anak.

Si Pacquiao mipabuhagay sa maong komento human ang video ni Jimuel nga nag-sparring atol sa usa ka exhibition match na-post sa Facebook  nga nakapabakho ni Jinkee pipila ka higayon.

"His mommy had cried several times telling him, 'Don't go into boxing, son',"  matud  pa ni Pacquiao diin ang gipasabot mao si Jinkee nga taud-taod na sab miawhag kaniya nga moretiro na sa pamuksing. 

Sa dihang personal niyang gikaestorya si Jimuel aron ipadangat ang iyang hangyo, si Pacquiao miingon nga gitubag siya sa iyang junior nga gusto gyud niining magboksing usa sama kaniya buot niini nga morepesentar sa nasud isip usa ka atleta.