Spence, Garcia nag-abot binyu sa ilang away

CEBU, Philippines — Nag-abot ang wa'y pildeng IBF welterweight champion nga si Errol Spence Jr. ug wa'y pildeng four-division world champion Mikey Garcia kagahapon didto sa AT&T  Stadium sa Arlington, Texas, ang binyu sa makasaysayanon nilang away nga gikatakda karong Marso 16.

Gipatung-an sa bilyonaryong si Jerry Jones, ang tag-iya sa Dallas Cowboys, kalma ra kaayo sila si Spence ug Garcia nga parehong mipadayag nga fans sila sa Cowboys. Wala sila magsinukliay og hait nga mga pulong, timaan nga buot nilang pasultion ang ila na lang mga kumo unya sa adlaw sa ilang  binukbukay.

Ang 29-anyos nga si Spence (24-0, 21KOs) mopedensa sa iyang IBF title batok ni Garcia (39-0, 30KOs) nga tuyo mikatkat sa welterweight division aron lamang siya hagiton.

Gani si Spence mas bug-at og 12 ka libras ug mas taas og upat ka pulgada nga kasway kun itandi ni Garcia.

Bisan tuod og dehado siya sa tapad, si Garcia masaligon nga ma-establisar niya ang iyang legasiya nga wa'y lalis iyang makab-ot kun iyang mapilde si Spence.

"This is history in the making," matud  pa  ni Garcia, ang kasamtangang WBC lightweight champion.

Sa iyang bahin, si Spence naglantaw sa unahan uban ang tumang kahinam sa away nga iyang gipaabot sa tibuok niyang kinabuhi.