Gov's Cup magsubay bag-ong format
CEBU, Philippines – Magsubay og bag-og format ang 2019 Cebu Governor's Cup Inter-Cities and Municipalities Developmental Basketball Tournament nga gikatakdang mosikad karong Marso 9.
Si Lyle Larida sa Cebu Provincial Sports Commission nagkanayon nga ang 41 ka mga entranteng koponan bahinon sa pito ka brackets segun sa distrito diin sila nasakop. Moduwa sila ubos sa single round robin format.
Ang top 2 teams (district champion ug runner-up) human sa unang hugna sa eliminasyon moabante sa quarterfinals uban ang cash bonus nga P100,000 ug P50,000.
Ang nahibiling 14 ka teams bahinon na sab ngadto sa duha ka grupo pinaagi sa drawing of lots.
Magtigi dayon sila sa laing round robin diin ang top 2 molahos ngadto sa crossover semifinals. Ang mga mananaog maoy magsangka sa kampiyonato sa usa ka best-of-three series.
Ang grand champion mobulsa og P500,000, samtang ang runner-up makadawat og P300,000.
Ang Talisay City Aquastars nga maoy naghari sa miaging edisyon sa tinuig nga torneyo uban ang wa'y pildeng 12-0 record, mopakita na sab og aksiyon aron modepensa sa ilang trono.
- Latest