St. Francis of Assisi mipaluhod sa Tribu Lycans
CEBU, Philippines – Ang gamhanang St. Francis of Assisi walay hunong nga mipakita og milagro dihang ilang gipaluhod ang Tribu Lycans, 90-80 pagsugod sa single round robin semifinals sa NorthBall 2K19 (6-feet under) basketball tournament niadtong Sabado didto sa Carmen gym sa amihanang bahin sa Sugbo.
Si Juk Juntilla, ang kanhi magduduwa sa Don Bosco Technological Center (DBTC) Greywolves sa CESAFI, maoy nangulo sa balanseng opensa sa St. Francis of Assisi nga mipatuasik og 16 puntos nga igo na kaayo alang kaniya aron ilhon isip 'best player of the game'.
Ang St. Francis of Assisi nakakuha sab og igong suporta gikan ni Rusty Aguilar nga mibagnos og 15 puntos ug ingon man ni Wendell Quiros nga mikabkab og 14 puntos sa maong kadaogan.
Gikulbaan ang St. Francis dihang ang ilang 25-15 nga bentaha sa first quarter nahilis ngadto na lang sa usa ka lugas, 46-45 sa halftime. Imbes maluya, nadasig hinuon ang St. Francis of Assisi sa pakigbisog ug nainat nila og balik ang labaw ngadto sa 80-70 human sa tulo ka kuwarter. Sukad niadto kontrolado na nila ang nahibiling mga gutlo sa duwa.
Si John Fitz Banzon mao sab ang topscorer sa napuhag nga Tribu Lycans pinaagi sa iyang 19 puntos.
Ikaduhang topscorer sa Lycans mao si Christian Bejoc nga mitimbre'g 14 puntos, samtang sila si Jeff Abella, Niño Suico ug Van Pono nagtampohay og 10 puntos ning maog liga nga gipadagan sa Thirdy's Jersey.
PUNTOS MATAG USA
ST. FRANCIS (90) – Juntilla 16, R. Aguilar 15, Quiros 14, B. Aguilar 9, Colon 9, W. Aguilar 8, Natividad 6, J. Aguilar 5, Olivar 4, Arias 2, Gervise 2.
TRIBU LYCANS (80) – Banzon 19, Bejoc 14, Abella 10, Suico 10, Pono 10, Capuno 8, Jayson 7, Davidon 1, Pongautan 1.
- Latest
