James Yap padayong mituyok og balik sa orasan
CEBU, Philippines — Padayon nga gituyok og balik ni James Yap ang orasan pinaagi sa pagmugna og impresibong salida nga naghatag kaniya sa labing una niyang Cignal-PBA Press Corps Player of the Week award ning 2019 Philippine Cup.
Bisan pa man sa hugot nilang iskedyul diin ang Rain or Shine miduwa tulo ka higayon sud sa lima ka adlaw, ang 6-foot-2 nga si Yap nakamaneho pagposte og average nga 13 points, 4.0 rebounds ug 1.6 assists aron tabangan ang Elasto Painters nga inaton ang nagkadina nilang daog ngadto sa lima.
Si Yap nga nag-37 anyos niadtong Valentine's Day, miiskor og 18 puntos sa 107-100 nga kadaogan sa Rain or Shine batok sa NorthPort niadtong Pebrero 8.
Duha ka adlaw ang milabay, ang two-time MVP namugnaw, apan nakatampo og dos puntos ug upat ka rebounds sa dihang ilang gibihag sa sa Phoenix, 98-94.
Bisperas sa adlaw niyang natawhan, si Yap nagmangtas og balik pinaagi sa pagkadlit og 18 puntos, apil na ang krusyal niyang three-point play nga maoy nag-aswat sa RoS ngadto sa kulbahinam nga daog batok sa Magnolia sa iskor nga 75-74 didto sa Mall of Asia (MOA) Arena.
Sa kasamtangan, ang Rain or Shine maoy naghari sa liderato bitbit ang 7-1 record.
Gipukan ni Yap ang teammate niyang si Beau Belga ug ingon man sila si JuneMar Fajardo, Terrence Romeo ug Arwind Santos sa San Miguel Beermen ug Alaska guard Chris Banchero, Carl Bryan Cruz ug Ping Eximiniano alang sa maong senemanang pasidungog.
- Latest
