Leylam FC nanghawod sa Sinulog bootfest

CEBU, Philippines — Ang Leylam FC misakmit og duha titulo sa tulo ka adlaw nga 9th Sinulog Football Festival nga nahuman  niadtong Domingo sa gabii diha sa Cebu City Sports Center.

Milampos ang Leylam pagdepensa sa ilang  trono  sa  men's open division human gipakaging ang Indiana Aerospace, 2-0. 

Nagpabilin sab nga kampiyon ang Leylam sa inter-company division  dihang ilang  gipilde ang ERCO FC, 2-1, pinaagi sa penalty shootout.

Sa men's open,  sila si Eni Famous ug Pinto Kabulo maoy mipanso sa duha ka goals sa Leylam nga nakapahagba sa Indiana Aerospace.

Sa sayo pa, ang Leylam ni coach Dan Villarico pabiling naghari sa inter-company human nakaipsot batok sa ERCO.

Sa laing mga kategoriya, ang Don Bosco United ug Los Amigos mao sab ang kampiyon.

Gipilde sa DBU ang Rising Sun, 1-0 aron pagdominar sa men's 38-above category, samtang ang Los Amigos mibuntog sa KN Ferraren, 1-0 aron paghari sa men's 45-above class.