Cebu Niños masentro sa atensiyon sa CVIRAA

CEBU, Philippines – Ang Cebu City Niños mao ang masentro sa atensyon atol sa 2019 Central Visayas Regional Athletic Association (CVIRAA) Meet nga buksan karong Domingo didto  sa  Dumaguete City.

Gawas nga sila ang pirmeng kampiyon sa maong multi-sporting event, ang Niños gilauman usab nga maoy mohulma og mas daghan nga mga atleta nga morepresentar sa Central Visayas sa Palarong Pambansa nga gikatakda   sa   Mayo didto sa  Dakbayan  sa Davao.

Kapin sa 900 ka mga atleta ug coaches sa Cebu City ang mibiyahe na padulong sa Dumaguete City.

Si DepEd-Cebu City division sports coordinator Gerome Misa miingon nga salmotan sa Cebu City athletes ang tanan sporting discipline gawas sa wushu.

Gilauman nga ang Niños gihapon ang maghari     ug     mogawas  nga  overall champion, apan  kinahanglan nga mopakita   gihapon     og impresibong performance ang mga atleta niini aron modako ang kompiyansa sa Central Visayas nga makapadala og lig-on nga koponan sa Palaro.

Ang Cebu City mihakot og 114 ka golds, 69 silvers ug 80 ka bronze medals sa miaging tuig.

Gawas sa Cebu City, laing mga koponan nga giatngan nga makahatag og lig-on nga atleta alang sa Region 7 naglakip sa Cebu Province,  Negros Oriental ug host Dumaguete City.