Pacquiao naghuwat lang sa tingog ni mayweather

CEBU, Philippines – Kun dili ang rematch uban ni Floyd Mayweather Jr., ihikling una ni Manny Pacquiao ang iyang plano nga mokatkat og balik sa ring karong Mayo.

Mao kini ang dagan sa huna-huna ni Pacquiao karon, segun pa ni international matchmaker Sean Gibbons nga sikit kaayo sa bugtong eight-division world champion niining panahona.

"At this moment, it appears that way," matud pa ni Gibbons ngadto sa The Philippine Star, igsuong mantalaan sa Banat News. "We'll see what the next week brings."

Klaro kaayo nga si Pacquiao nagpaabot lang nga makadungog gikan mismo sa baba ni Mayweather nga buot niini nga makig-binukbukay og usab kaniya.

Kun ugaling magpabiling hilom si Mayweather, hayan si Pacquiao mopahuway usa og pipila ka mga bulan kaysa moaway karong Mayo.

Sa miaging semana, si Pacquiao mipadayag nga puwede siyang mo-away sa bulan sa Mayo o Hulyo ug kun modaog mahimo pa siyang mo-away og usab sa dili pa matapos ang tuig.

Apan dunay kakulian si Pacquiao sa iyang plano kay siya man maoy gitahasan nga campaign manager sa PDP-Laban sa umaabot nga eleksiyon karong Mayo 13.