Cebu runners nanaog sa 7-Eleven footrace

CEBU, Philippines — Midominar ang mga Cebuano runners sa tagsa-tagsa nila ka dibisyon sa 7-Eleven Run Series 2019 kagahapon didto sa Cebu Business Park.

Ang Cebuana Olympian nga si Mary Joy Tabal nangulo sa Cebu runners nga mingdaog human niya gisakmit ang 21K women's title sa oras nga 1:24:39. Si Ann Magdalene Tubal misakiyo sa ikaduhang dapit sa oras nga 1:42:36, samtang si Engiel Estellore milabni sa ikatulong luna sa oras nga 1:45:01.

Sa 21K men's, ang pambato sa Spectrum Runners nga si Prince Joey milabni sa titulo sa oras nga 1:12:22 gisundan nila ni Kenyan Eric Chepsiror (1:16:15) ug Helbert Elarcosa (1:28:17).

Nanghawud sa 32K sila si Ruffa Sorongon ug Azlan Pagay. Si Sorongon maoy reyna sa oras nga 2:22:01 gisundan nila ni Evamie Villarin (2:34:31) ug Stephanie Cadosale (2:37:02), samtang si Pagay maoy midaog sa men's sa oras nga 1:56:53. Gisundan siya nila ni Kenyan Jackson Chirchir sa oras nga 1:56 ug Bereden Ansiong sa oras nga 2:00:52.

Ang Cebu based nga si Jayson Marie Stephan maoy midaog sa 42K women's race sa oras nga 3:42:15, samtang si Kenyan Joseph Mururi ang hari sa oras nga 2:47:16. (BANAT NEWS)