George, Westbrook bida sa Oklahoma Thunder

CEBU, Philippines – Mikabkab og 36 puntos si Paul George  ug milangkat og  walo ka rebounds, samtang si Russell Westbrook mihimo na sab og 'triple-double' uban ang 29 points,  14   ka   assists ug 10  ka  rebounds sa dihang ang  Oklahoma City Thunder  mipakaging sa  Portland Trail Blazers, 123-114  sa NBA kagahapon  didto sa Chesapeake Energy Arena sa Oklahoma City.

Sila si Steven Adams ug Terrance Ferguson mitampo'g 14 puntos matag usa alang sa Thunder nga mipakgang sa tulo ka sagunson nilang pilde batok sa Trail Blazers.

Human mapilde kalima sa unom ka duwa, ang Thunder nakasagunson karon og tulo ka daog aron mosaka og balik sa ikatulong dapit sa Western Conference standings.

Si Damian Lillard adunay 34 puntos ug walo ka assists, samtang si C.J. McCollum mi-iskor og 31 puntos alang sa Blazers, kansang tulo ka sunod-sunod nga daog naputol.

Didto sa Toronto, sila si Kyle Lowry ug Fred VanVleet mihipos og 19 puntos matag usa, samtang si Pascal Siakam miamot og 18 puntos sa dihang gipukan sa Raptors ang Sacramento Kings sa iskor nga 120-105.

Miamot si Serge Ibaka og 15 puntos ug 10 ka rebounds sa Raptors nga miposte sa ika-10 niining daog didto sa ilang korte.

Sa lain pang mga duwa, ang Dallas Mavericks mipilde sa Los Angeles  Clippers sa iskor nga 106-98 ug midaog sab ang Minnesota Timberwolves batok     sa   Phoenix Suns sa iskor nga 118-91.