Nagaras lang mata ni Pacquiao

CEBU, Philippines – Ang angol sa mata nga nahiaguman ni Manny Pacquiao atol sa unanimous decision niyang kadaogan batok ni Adrien Broner, usa lamang ka gamay'ng garas sa iyang cornea ug maayo na karon ang paminaw sa Pinoy ring star segun sa iyang tigpamaba.

Segun sa nahiunang balita sa New York Daily News, nga pipila ka sakop sa Team Pacquiao ang gibati og tumang kabalaka gumikan sa injury sa walang mata ni Pacquiao kay tingalig mao kini ang makatak-op sa tabil sa mabulukon niining karera sa boksing.

Gani atol sa presscon human niya gikulata si Broner aron pagpabiling WBA welterweight champion niadtong Domingo didto sa MGM Grand Garden Arena sa Las Vegas, si Pacquiao nagpunay og pahid sa iyang mata ug klaro nga duna kini gipamati nga dili maayo. 

Kagahapon sa buntag, makita nga duna na'y eye patch ang walang mata ni Pacquiao.

Apan basi sa taho sa Agence France Presse nga maayo na karon ang paminaw ni Pacquiao ug dili seryoso ang injury niini segun sa gikahadlokan sa iyang mga fans.

Timaan niini,  gitangtang na sa 40-anyos nga si Pacquiao ang iyang eye patch ug mitan-aw pa sa duwa tali sa Los Angeles Lakers ug Golden State Warriors sa NBA kagahapon didto sa Staples Center sa Los Angeles, California.

Si Pacquiao  nga miinat sa iyang rekord ngadto sa 61-7 uban ang 39KOs, mipadayag nga mopadayon gihapon siya og away bisan og duna pa siya'y mga obligasyon isip senador sa Pilipinas.

"I will ask my promoters who's next and we will announce that in proper time," pasalig pa ni Pacquiao.

Bukas sab si Pacquiao sa gihandum nga 'rematch' nilang Floyd Mayweather Jr. sa tinguha nga makabawos batok sa wa'y pildeng Amerikano atol sa una nilang engkuwentro niadtong 2015 nga kontrobersiyal man tuod, apan mihimo og marka isip labing dako nga away sa kasaysayan sa boksing.

"Tell him to come back to the ring and we will fight," tipik pa sa paghagit ni Pacquiao ngadtong Mayweather nga magpinaksitay sila og usab ibabaw sa ring.