Sixers mipahagsa sa Rockets
CEBU, Philippines – Mipabuto og 32 puntos si Joel Embiid ug milangkat og 14 ka rebounds sa dihang ang Philadelphia 76ers nakasugakod sa 37 puntos ni James Harden aron pahagsaon ang Houston Rockets, 121-93 sa NBA kagahapon didto sa Wellls Fargo Center sa Philadelphia, Pennsylvania.
Mao kadto ang ika-20 nga sagunson nga duwa nga si Harden miiskor og dili momenos 30 puntos, apan ning higayona wala siya kaugpo sa mangtas nga Sixers.
Miarangkada dayon ang Sixers pagsugod sa duwa dayon na ngadto sa pagposte og 15 puntos nga bentaha sa halftime, 65-50.
Misamot pa ang kainit sa Sixers sa ikatulong kuwarter diin ilang gilat-an ang Rockets, 29-13 aron pag-inat sa ilang labaw ngadto na sa 31 puntos. Wala na makabangon pa sukad niadto ang misaliring nga Rockets.
Didto sa New York, si Paul George mipabuhagay og 31 puntos ug si Russell Westbrook mitampo'g 17 puntos, 10 ka rebounds ug siyam ka assists sa Oklahoma City Thunder nga mipakugang sa Knicks, 127-109.
Si Dennis Schroder midonar og 17 puntos ug sila si Jerami Grant ug Abdel Nader dunay 16 puntos matag usa alang sa Thunder nga nagkupot na karon og 28-18 nga baraha.
Wala na molingi pa ang Thunder human sa ilang 34-16 nga labaw.
Sa laing aksiyon, si Giannis Antetokounmpo miratsada og 31 puntos uban ang 15 ka rebounds sa dihang gipakgang sa haring Milwaukee Bucks ang Dallas Mavericks 116-106.
Ang Slovenian rookie nga si Luka Doncic maoy nangu sa Mavs uban ang 18 puntos, 11 ka rebounds ug 10 ka assists alang sa labing unang 'triple-double' sa iyang karera sa NBA.
Samtang sila si Trevor Ariza ug Otto Porter nagkumboya'g 30 puntos sa dihang gilubong sa Washington Wizards ang Detroit Pistons, 101-87 ug si D'Angelo Russell mikolekta og 31 puntos sa dihang gilampurnas sa Brooklyn Nets ang Sacramento Kings, 123-94.
- Latest