Tepora magpabilin sa featherweight

CEBU, Philippines — Bisan og nagkaproblema sa iyang timbang nga miresulta   sa pagkanselar sa iyang away sa undercard unta sa sangka nilang Manny Pacquiao ug Adrien Broner niadtong Domingo didto sa MGM Grand Garden Arena sa Las Vegas, si Jhack 'El Capitan' Tepora mibutyag nga wala siya'y plano nga mosaka og timbang.

Ang walay pildeng Sugboanong world boxing champion gikatakda unta nga modepensa sa iyang WBA interim featherweight title batok ni Mexican challenger Hugo Ruiz, apan nahimong usa ka katalagman ang iyang U.S. debut gumikan kay mitimbang siya og 131.5   libras nga sobra og 5.5   libras sa gitagana nga timbang ubos sa featherweight class.

Si international matchmaker/promoter Sampson Lewkowicz, ang manedyer ni Ruiz, mihimo dayon og lakang nga ikanselar ang away gumikan kay dili siya gusto nga irisgo ang panglawas ni Tepora.

Ang problema sa timbang mihamok nang daan sa 23-anyos nga si Tepora sa iyang pagbiya sa Manila sa miaging semana. Kini kay oveweight man siya og 20  libras sa iyang pagbiyahe sa Los Angeles.

Bisperas sa weight-in, misamot ang kahadlok nga dili niya makuha ang timbang gumikan kay si Tepora man mismo ang mipahibalo nga overweight gihapon siya og unom ka libras.

Bisan pa man niining tanan, si Tepora mi-insister nga magpabilin siya sa featherweight division dungan ang pasalig nga mobalik siya nga mas hait ug mas kusgan.

"I am sorry to all those who were affected by my mistake, especially to sir Manny (Pacquiao). I have learned my lessons well and I promise it won't happen again," matud pa ni Tepora nga nagbitbit og 22-0 record uban ang 17KOs. "I will stay as a featherweight, and I will come back stronger." (BANAT NEWS)