Broner gilatos, Mayweather gihagit pag-usab
Dominanteng Pacquiao
CEBU, Philippines — Sa edad nga 40-anyos, gipakita ni Manny Pacquiao ang kaabtik ug kusug dihang iyang gikulata sud sa 12 ka rounds ang American boxer nga si Adrien Broner aron panalipdan iyang WBA welterweight title kagahapon didto sa MGM Grand Arena sa Las Vegas.
Sa iyang pagbalik og away sa US human ang duha ka tuig, si Pacquiao mipamatuod nga layu pa gyud siya sa 'retirement' human sa iyang dominante nga performance batok sa mas bata nga si Broner. Si Pacquiao midaog pinaagi sa unanimous decision, 117-111, 116-112, 116-112.
Si Pacquiao kinsa misaka sa record nga 61-7, 39KOs, mipakita nga daghan pang kusug ang nahibilin kaniya og andam pa siya nga moaway lakip na ang rematch batok ni Floyd Mayweather Jr., kinsa personal nga misaksi sa iyang away.
"Tell him (Mayweather) to come back to the ring and we will fight," matud pa ni Pacquiao atol sa post-fight interview. "I am willing to fight again Floyd Mayweather. If he is willing to come back in boxing."
Si Pacquiao nakitaan og kaagresibo dihang kapila niya gidasdas si Broner, kinsa way laing nabuhat kung di ang pag-atras ug paghuwat nga makatugpa siya og counter-punch batok ni Pacquiao.
Daw napuling si Broner sa kapaspas ni Pacquiao og igo nalang siya pagkupot ug pagamit sa iyang siko aron mapahinay ang atake sa 'Fighting Senator'.
Si Pacquiao nakabuwelo og kulata ni Broner sa seventh round diin gisuwerte ang nauwahi human makagakus sa Pinoy ring star. Nausban kini sa ninth round dihang usa ka makabungog nga hook sa suwang ni Broner ang gipasud ni Pacquiao. Nagkapa-kapa nga miatras si Broner kinsa nagkabuang pagkuha sa iyang balanse aron dili matumba. (BANAT NEWS)
- Latest
