Ancajas modepensa batok Japanese boxer

CEBU, Philippines — Dili pa panahon aron mahitabo ang gusto ni Pinoy boxing champion Jerwin Ancajas nga unification bout batok Thai superstar Srisaket Sor Rungvisai.

Kini human si Ancajas gimanduan sa IBF nga modepensa sa iyang super flyweight title batok sa mandatory challenger gikan sa Japan nga si Ryuichi Funai sa Abril sa wala pa matinong venue.

"I was a little disappointed because I thought I would be fighting Rungvisai,"matud pa ni Ancajas sa ESPN5.

Ang 27-anyos nga si Ancajas kinsa walay undang sa training, nagpaabot sa sangka batok ni WBC champion Rungvisai, apan mas mag-una pa ang iyang title defense tungod kay mao kini gusto sa IBF.

"Top Rank hasn't given us the date but it's definitely April," matud pa sa manager ni Ancajas nag si Sean Gibbons.

Bisan pa og dismayado gamay, si Gibbons pabiling positibo nga mahitabo ra ng sangka tali sa duha ka kampiyon nga sila si Ancajas ug Rungvisai, apan kinahanglan una nga seguruon sa iyang batos nga mapanalipdan ang bakus batok ni Funai.

Si Ancajas mihimo og tulo ka title defense sa miaging tuig nga naglakip sa iyang kadaugan batok ALA boy Jonas Sultan. (BANAT NEWS)